ताकद शब्दांची

*ताकद शब्दांची*

दोस्त(उभयवचन,लिंग)
तुझ्या शब्दांतच
हवी इतकी ताकद
वाचकांच्या चक्षूंसमोर
राहिलं पाहिजे उभं चित्र
आणि
गहिवरले पाहिजे अंतकरण
निष्ठुराचेही

हृदय पिळवटून योग्य भावबंधासह
रसांचा परिपोष शब्दाशब्दांतून इतका निथळला पाहिजे की
आठवणच नये होऊ
इतर माध्यमांची

चित्र समजत नाही म्हणून कविता
की
काव्यातील दुर्बोधता झाकण्यासाठी चित्र?

समांतरणच असेल करायचं तर
एका वेळी एकाच रंगशब्दमंचावर हवं असं की
रेलगाडीचे समांतर रूळ
वाचक/दर्शनार्थी यांची भंबेरीच उडायला पाहिजे सर्वोत्तम निवडताना

वाचताना नुसता शब्दांच्या महापुरात घुटमळला पाहिजे आत्माही
तसा रंगांच्या महासागरातही विरघळला पाहिजे

दोस्त
आणखी एक
मला हवी तुमच्याकडून
अशी जादूमय गुंफण शब्दांची
मीच जावा स्वत:ला हरवून वर्तमान,भूत आणि भविष्यातील व्यथा-चिंता, सुख-दुःख:, याग-यातनांसह

किंवा
व्हायला हवा साकार
असा रंगांचा माहौल
होईल एकरूप त्यात
अनंतकाळ अंतराळात तरंगणारा आत्मा त्रिशंकू अाणि माझाही

मी एक
तुमच्या शब्दांवर
तथा रंगांवरही
स्वतंत्र-स्वतंत्र
जीव ओवाळणारा
रसिक.

.           *रमेश*