चंद्र, चांदवा, चांदणी, चंद्रमा
चंद्र उगवला गं पुनवेचा
भरतं आलंया हुरद्याला
चढवा आभ्रे नवे करकरीत
बैठकीतल्या गिरद्याला ||धृ||
आज चंद्रमा लाजत मुरकत
उभी राहिली गडे
नभी चांदणं घेऊन आली
धवल टपोरे खडे
स्वप्नातील चांदवा खुणवितो
पाहून ऐन्याकडे
कैद करीन मी हृदयमहाली
सापडला तर त्याला ||१||
आवरत नाही वेग मनाचा
कशी थोपवू त्याला
डचमळतो भर भरून उलटतो
हा ज्वानीचा प्याला
दिलवर माझा आज फाकडा
हाक ऐकुनी आला
हाका घाला लवकर बाई
हलगी ढोलकी सुरत्याला ||२||
चटक चांदणी मी मदनाची
आली जवानी फुलून
नयनबाण सोडीता इष्काचा
पब्लिक जातंय भुलून
ऐन्यामध्ये रूप मावंना
काया आलीया खुलून
साजिंदे बोलवा लवकरी
साथ जीजी रं
द्यायला ||३||
*रमेश*
No comments:
Post a Comment