दर्शन आणि पूजा

.   *दर्शन आणि पूजा*

तशी तर
कुणालाच गरज नाही
विठ्ठल-रखुमाईच्या
पूजा आणि दर्शनासाठी
घराबाहेर जाण्याची

पोरांंच्या  शिक्षणासाठी
फॅक्टरी,आॅफिसात
कणकण झिजणारा
पोटभर मिळावी त्यांना
भाकरी यासाठी
मातीत मळणारा
दूध-दुभत्यांनी व्हावं
लहानग्यांचं पोषण म्हणून
शेण-घाण उपसणारा
हौसमौज चिमुरड्यांची
भागवणं हे
आपलं जन्मसिद्ध कर्तव्य म्हणून
कारखान्यात पत्र्याच्या छताखाली जळणारा
उसणे,मागून,कर्जाऊ,भिक्षून
अाणि क्वचित उचलेगिरी,चोरी,
दरोडा,धाक-दादागिरी करूनही
कुणी बाप जमवत असतो
पै-पै आपल्या लेकरांसाठी

नसेल त्याच्या पायाखाली वीट
किंवा नसतील त्याचे कमरेवर हात
म्हणून काय तो विठ्ठल नाही?

आणि नऊ महिने पोटात वागवून
जन्मावेळी मरणयातना सोसून
जन्मानंतरही कित्येक दिवस
पाजण्यासाठी स्वत:च्या
रक्ताचं दूध करून
प्रसंगी स्वत: उपाशी राहून
चिऊकाऊचा घास
बाळाला भरवणारी
त्याचं दुखणं-खुपणं निस्तरणारी
काळजाच्या तुकड्याप्रमाणं जीव लावणारी 
मुलाची हौसमौज पुरवताना
बापाची बोलणी आणि
मारही खाणारी
आलेल्या शिदोरीतील
घास-घास बाळांना वाटणारी आई

अंगावर भरजरी शेला नाही
म्हणून
ऐटीत उभी नाही म्हणून
काय ती रखुमाई नाही?

ही जितीजागती दैवतं
सोडून खरंच कुणालाही
गरज नाही
विठ्ठल-रखुमाईच्या पूजेसाठी
घराबाहेर जाण्याची.
.                         *रमेश*